Ագաթա Քրիստիի ամենահակասական գործը՝ «Ռոջեր Էքրոյդի
սպանությունը»՝ իր նորարարական վերջաբանով, նոր էջ բացեց դետեկտիվ ժանրի
պատմության մեջ: 1926թ. լույս տեսած վեպը համարվում է բոլոր ժամանակների լավագույն
դետեկտիվ ստեղծագործություններից մեկը: Անգլիայի խաղաղ գյուղակներից մեկը՝ Քինգզ
Էբոթը, ցնցվում է տեղի մեծահարուստ ու հարգարժան մարդկանցից մեկի՝ Ռոջեր Էքրոյդի
սպանության լուրից: Առաջին հայացքից պարզ թվացող գործը աստիճանաբար ավելի ու ավելի
խճճված ընթացք է ստանում: Եվ միայն Էրքյուլ Պուարոն, որ երջանիկ պատահականությամբ
անցել է հանգստի ու ինկոգնիտո բնակություն հաստատել Քինգզ Էբոթում, կարող է բացել
կծիկը: Այս հարցում նրան օգնում է բժիշկ Շեփարդը, որի անունից էլ ներկայացվում է
պատումը:
Ձեզ ենք ներկայացնում 27 մեջբերում՝ Ագաթա Քրիստիի «Ռոջեր
Էքրոյդի սպանությունը» գրքից:
1.
Տարօրինակ է, բայց երբ ինքներդ գաղտնի ինչ-որ բան եք կասկածում,
որ չեք ցանկանում խոստովանել, ուրիշ մեկի կողմից դրա բարձրաձայնումն այն հերքելու բուռն
ցանկություն է արթնացնում ձեր մեջ:
2.
Անձնական փորձից գիտեմ, որ այն կանայք, որոնք որոշում են ինքնասպանություն
գործել, սովորաբար ցանկանում են բացատրել, թե ինչպիսի հոգեվիճակում են գտնվել այդ ճակատագրական
քայլին դիմելիս: Նրանք միշտ տենչում են ուշադրության կենտրոնում լինել:
3.
Բժիշկները միշտ գիտեն ամեն ինչ, բայց երբեք ոչինչ չեն ասում:
4.
Սովորությունների կապանքները: Մենք աշխատում ենք որոշակի նպատակի
հասնելու համար և հասնելուն պես հասկանում ենք, որ կարոտում ենք մեր նախկին աշխատանքն
ու առօրյան, և նկատի՛ ունեցեք, մսյո՛, որ իմ աշխատանքը հետաքրքիր էր՝ ամենահետաքրքիրն
աշխարհում:
5.
Պարզապես վախեցնում է այն, որ ժամանակակից երիտասարդ աղջիկները
կարդում են ու ձևացնում, թե հաճույք են ստանում դրանից:
6.
Ոչ ճիշտ ժամանակին բերանից թռցրած խոսքը մեծ վնաս կարող է տալ:
7.
Բայց Դուք պետք է մի բան պարզ հասկանաք: Եթե ես վերցնեմ այս
գործը, ապա մինչև վերջ կգնամ: Հիշե՛ք, լավ շունը հետքը չի թողնում:
8.
Պետք է միշտ մեթոդիկ գործել: Ես սխալվեցի՝ Ձեզ այդ հարցը տալով:
Ամեն մեկին պետք է իր ոլորտից հարցնել:
9.
- Բացարձակապես էական չէ,- ասաց Պուարոն ու ցածրաձայն ավելացրեց,-
այդ պատճառով էլ այդքան հետաքրքիր է:
10. - Մսյո՛ բժիշկ, նմանատիպ բազմաթիվ գործերի հետ առնչվելու դեպքում Դուք կնկատեիք,
որ դրանք բոլորն էլ մեկ ընդհանրություն ունեն:
- Եվ ո՞րն է դա,- հետաքրքրասիրությամբ
հարցրի ես:
- Բոլորը, ովքեր առնչություն ունեն
դրանց հետ, ինչ-որ բան են թաքցնում:
11.
Ամեն ինչ պարզ է դառնում, երբ փաստերը համակարգված ես դասավորում:
12. Աշխարհի բոլոր դժբախտությունների պատճառը փողն է կամ դրա բացակայությունը:
13.
Ինչ էլ որ լինի, տան անդորրն ամեն ինչից թանկ է։
14.
Հասկացե՛ք մի բան, իմ նպատակը ճշմարտությանը հասնելն է։ Իսկ ճշմարտությունը, որքան
էլ սարսափելի լինի, միշտ հետաքրքիր և գեղեցիկ է այն որոնողի համար։
15. - Les femmes,- ամփոփեց Պուարոն։- Նրանք սքանչելի են. առանց որևէ մեթոդի հորինում
են վարկած, և ինչ-որ հրաշքով պարզվում է, որ նրանք ճիշտ են։ Սակայն իրականում այդքան
էլ այդպես չէ։ Կանայք ենթագիտակցաբար բազմաթիվ մանր դետալներ են նկատում։ Նրանց ենթագիտակցականն
այս բոլոր մանրուքները դնում է կողք կողքի, իսկ դրա արդյունքն անվանում են ինտուիցիա։
16. Բարեբախտաբար, հնարամտորեն օգտագործված բառերը կարող են քողարկել չոր փաստերի
այլանդակությունը:
17. Վերջիվերջո ինչքա՜ն հանցագործություններ են կատարվել
հինգ հարյուր ֆունտից շատ ավելի քիչ փողի համար: Ամեն ինչ կախված է նրանից, թե որքան
գումար է անհրաժեշտ մարդուն կոտրվելու համար: Դա հարաբերական է, այդպես չէ՞:
18. Անգլիացիները թաքցնում են միայն մի բան՝ իրենց սերը:
19. Խելացի մարդն իր մտքերը չի բարձրաձայնում:
20.
Տղամարդուն ինչքան ուզես կարող ես ճնշել, բայց կնոջ դեպքում չես կարող շատ հեռուն գնալ,
քանի որ կինը սրտի խորքում միշտ ձգտում է ասել ճշմարտությունը: Քանի՜ տղամարդ, որ դավաճանել
է իր կնոջը, հանգիստ խղճով մահացել է՝ գաղտնիքը իր հետ գերեզման տանելով: Քանի՜ կին,
որ դավաճանել է ամուսնուն, խորտակել է կյանքը` ճշմարտությունն ամուսնու դեմքին շպրտելով:
Հուսահատության պահին նրանք մոռանում են ինքնապահպանման բնազդի մասին ( ինչի մասին
հետագայում զղջում են, bien entendu) և առանց հետևանքների մասին մտածելու՝ ասում ճշմարտությունը՝
մեծ, բայց րոպեական բավականություն ստանալով:
21.
Մադմուազե՛լ, մի քանի օր առաջ, երբ մենք նստած էինք սեղանի շուրջ, ես աղաչում էի Ձեզ
անկեղծ լինել ինձ հետ։ Իսկ այն, ինչ չեն ասում հայր Պուարոյին, նա ինքն է պարզում:
22.
Ինչու՞ են Անգլիայում մտածում, որ սիրո մասին պետք է հիշատակել այնպես, ասես այն ամոթալի
գաղտնիք է։
23.
- Գիտե՞ք,- ասացի ես՝ ձեռքիս ունելին ցած դնելով,- այս ամենը չափազանց հետաքրքրաշարժ
է։ Ամեն մի նոր բացահայտում նման է կալեյդոսկոպը պտտելուն. պատկերն ամբողջովին փոխվում
է։
24. Ես սկսել էի հասկանալ Պուարոյի մեթոդները։ Յուրաքանչյուր անպատեհ թվացող մանրուքն
անգամ ազդեցություն է ունենում ամբողջի վրա:
25. Երբեք մի՛ անհանգստացեք այն բանի համար, ինչ ասել եք տղամարդուն։ Նրանք այնքան
ինքնահավան են, որ երբեք ասածդ լուրջ չեն ընդունի, եթե դա չի շոյում իրենց եսը։
26.
- Մեթոդ, կարգ ու կանոն և փոքրիկ մոխրագույն
բջիջներ:
- Բջիջնե՞ր,-
աչքերը չռելով հարցրեց քննիչը:
- Ուղեղի փոքրիկ մոխրագույն բջիջները,- բացատրեց
բելգիացին:
- Օ՜հ, դե իհարկե, կարծում եմ՝ մենք բոլորս
օգտագործում ենք դրանք:
- Ավել կամ պակաս չափով,- մրթմրթաց Պուարոն:-
Կան նաև որակական տարբերություններ:
27.
Օգտագործե՛ք Ձեր փոքր մոխրագույն բջիջները։ Իմ գործողությունների հիմքում միշտ ինչ-որ
պատճառ կա:
Leave a Comment