ՀԻՄՆԱԴՐՈՒՄԸ

«Էդիթ Պրինտ» հրատարակչությունը հիմնադրել է ֆիզիկոս-աստղագետ Մկրտիչ Կարապետյանը 1993 թվականին՝ հետխորհրդային Հայաստանի համար սոցիալական և պատերազմական ծանր անցումային փուլում: Նորաբաց հրատարակչությունն ուներ ընդամենը մի քանի համակարգիչ, սակայն տքնաջան աշխատանքով և համառությամբ հետզհետե ոտքի կանգնեց և արդեն երկար տարիներ հանդիսանում է հայաստանյան գրաշուկայի առաջատարներից մեկը:

ԳՈՐԾՈՒՆԵՈՒԹՅԱՆ ՈԼՈՐՏԸ

Մասնագիտացած լինելով գրքերի տպագրման և հրատարակման գործում՝ տասնամյակների իր գործունեության ընթացքում հրատարակչությունը լույս է ընծայել ավելի քան 5000 անուն գիրք: «Էդիթ Պրինտի» գործունեությունը բազմաճյուղ է՝

հայ դասական գրականություն (Հ. Թումանյան, Ավ. Իսակահյան, Րաֆֆի, Վ. Տերյան, Ստ. Զորյան, Ե. Չարենց, Զապել Եսայան, Շահան Շահնուր, «Իմ գրադարանը» և «Ինքնություն» մատենաշարեր ևն)

համաշխարհային դասական գրականություն՝ հայերեն թարգմանությամբ (Է. Մ. Ռեմարկ, Ագաթա Քրիստի, Անտուան դը Սենտ-Էքզյուպերի, Ալ. Դյումա, Թ. Դրայզեր, Է. Զոլա, Օսկար Ուայլդ, Բրամ Սթոքեր ևն)

հայ և արտասահմանյան (հայերեն թարգմանությամբ) ժամանակակից գրականություն (Վահագն Դավթյան, Նորայր Ադալյան, Նշան Աբասյան, Դավիթ Սամվելյան, «Արդի» մատենաշար, Ջոն Գրին, Նիկոլաս Սփարքս, Մարկ Լևի, Ժորժ Սիմենոն ևն)

մանկական և պատանեկան գրականություն (Հ. Թումանյան, Յուրի Սահակյան, Ռուբեն Մարուխյան, Ճուղուր Երևանցի, Քրիստ Մանարյան, «Ընտիր հեքիաթներ», «Հայտնի հեքիաթագիրներ» մատենաշարեր, «Հայրենի պատմություններ» շարք, բանաստեղծությունների և հեքիաթների ժողովածուներ)

կրթական գրականություն (դասագրքեր, մեթոդական ձեռնարկներ, ուսումնաօժանդակ գրքեր)

մշակութային գրականություն («Կոմիտաս», «Փելեշյան», «Փարաջանով», «Սոս Սարգսյան», «Վարդգես Սուրենյանց», «Խաչքար. խաչքարի արվեստը», «Ազգային երգարան», «Հայկական տարազ. պատկերազարդ ալբոմ», «Ուրբաթագիրք» ևն)

հայ գրականություն՝ թարգմանված օտար լեզուներով (Հ. Թումանյանի բանաստեղծությունները, բալլադները, հեքիաթները, «Հայ ժողովրդական հեքիաթներ», «Սասնա ծռեր» էպոս, տուրիզմին վերաբերող գրականություն ևն)

տարբեր ոլորտների մասնագիտական գրականություն (Բիզնես/մոտիվացիա՝ Ֆիլ Նայթ, Շոն Քովի, Ջեյմս Քլիըր, Սպենսեր Ջոնսոն, Ջոն Մաքսվել ևն: Կենսագրականներ Քըրք Քըրքորյանի, Գալուստ Գյուբենկյանի, Մանթաշյանցի, Արամյանցի և այլոց մասին: Ծրագրավորում և այլ գիտահանրամատչելի գրականություն՝ «JAVA. ծրագրավորման սկզբունքներ», «Python. ծրագրավորում 0-ից» ևն):

ԱՌԱՔԵԼՈՒԹՅՈՒՆԸ

«Էդիթ Պրինտը» իր առաքելությունն է համարում ընթերցողին հիմնարար և օգտակար գրականություն մատուցելը, որից օգուտ կքաղեն և՛ անհատը, և՛ պետությունը։ Հրատարակչությունն աշխատում է ընթերցանության խթանման և տարածման ուղղությամբ: «Էդիթ Պրինտը» ոչ միայն հրատարակչություն է, այլև կրթական և մասնագիտական զարգացման հարթակ։

ԾՐԱԳՐԵՐ ԵՎ ՄԻՋՈՑԱՌՈՒՄՆԵՐ

Կրթական էքսկուրսիաներ

Գրքերի զարմանահրաշ աշխարհը բացահայտելու լավագույն միջոցը այցելությունն է հրատարակչության տպարան։ «Էդիթ Պրինտի» կրթական էքսկուրսիաները համադրում են ճանաչողական շրջայցը և զարգացման ծրագրերը, որոնց շնորհիվ թե՛ դպրոցականները, թե՛ ուսանողները ձեռք են բերում յուրահատուկ փորձառություն։ Այստեղ սովորական թուղթն ու ներկերը վերածվում են գրքերի, իսկ մասնակիցները վերադառնում են նոր գիտելիքներով, հմտություններով ու ոգեշնչմամբ։

Սեմինարներ կազմակերպությունների համար

«Էդիթ Պրինտ»-ում իրականացվում են ժամանակակից փափուկ հմտությունների սեմինարներ կազմակերպությունների համար՝ նպաստելով դրանց աշխատակիցների անձնային աճին և աշխատանքային գործունեության արդյունավետությանը։

Համահայկական ընթերցանության մրցույթներ

«Էդիթ Պրինտը» պարբերաբար կազմակերպում է համահայկական ընթերցանության մրցույթներ՝ միտված աշակերտների՝ գրքի և ընթերցանության նկատմամբ հետաքրքրության մեծացմանը, որոնց մասնակցել են հազարավոր աշակերտներ Հայաստանից և սփյուռքից:

Համագործակցություն և մասնագիտական համայնք

«Էդիթ Պրինտը» համագործակցում է բազմաթիվ ճանաչված գրողների, գիտնականների և ուսուցիչների հետ, ունի առաջնակարգ մասնագետներով ու ժամանակակից սարքավորումներով հագեցած տպարան և հրատարակչական բաժին, որտեղ անցկացվում են քննարկումներ, սեմինարներ և շնորհանդեսներ:

Բարեգործական ծրագրեր

Հանդես է գալիս տարբեր բարեգործական ծրագրերով և միջոցառումներով, այդ թվում՝ համայնքային և դպրոցական գրադարանների համալրումներով:

Ցուցահանդեսներ և մրցանակներ

Հրատարակչությունը պարբերաբար մասնակցում է հայաստանյան և միջազգային գրքային ցուցահանդեսների, գրարվեստին վերաբերող մրցույթների, որոնց ընթացքում բազմիցս արժանացել է մրցանակների, այդ թվում՝

• «Գլխավոր մրցանակ Հակոբ Մեղապարտի «Ուրբաթագիրք» հուշանվերային գրքի տպագրության համար»՝ ՀՀ մշակույթի նախարարության կողմից, 2012 թ.

• «Լավագույն հրատարակչական ընկերություն»՝ «Համազգային վստահություն» խորհրդի կողմից, 2013 թ.

• «Տարվա բեսթսելերների հրատարակիչ»՝ «ԱՐՄԵՆՊՐԵՍ» լրատվական գործակալության կողմից, 2025 թ.

• ԱՊՀ անդամ պետությունների «Գրքարվեստ» միջազգային մրցույթի կողմից Էդիթ Պրինտի գրքերը բազմիցս արժանացել են գրան պրի և գլխավոր մրցանակների, այդ թվում՝

«Արարատ-պատկերագիրք», Շմավոն Շմավոնյան 2014 թ,
«Պարույր Սևակ», Յուրի Պետրոսյան, 2014 թ.,
«Քչից-շատից, ամեն ինչից», Նարինե Միրզոյան, 2021 թ.,
«Հայկական տարազ» / հայ.-անգլ., Գևորգ Բրուտյան, 2023 թ.,
«Թումանյանը՝ աշխարհի երեխաներին» / հայ.-անգլ., Նազելի Կարապետյան, 2023 թ.:

Թվային և կրթական հարթակներ

Էդիթ Պրինտի նախաձեռնություններից մեկն էր krtaditak.am կայքի ստեղծումը՝ որպես հրատարակչության ուսումնադաստիարակչական և ժամանցային հարթակ: Ինտերնետային մեկ տիրույթում հասանելի են հայ և համաշխարհային մանկապատանեկան գրականության լավագույն նմուշները, ինչպես նաև բազմաթիվ ճանաչողական ու հետաքրքրաշարժ հոդվածներ, խաղեր։

krtadarak.am կայքում զետեղված են հրատարակչության հրատարակած դասագրքերի և մեթոդական ձեռնարկների էլեկտրոնային տարբերակները, որոնցից անվճար կարող են օգտվել ինչպես ուսուցիչները, այնպես էլ սովորողները:

Տարածում և գրախանութներ

Էդիթ Պրինտի հրատարակած գրքերը ներկայացված են Հայաստանի հանրապետության բոլոր մարզերում՝ գրախանութներ, գրատներ, առևտրի և տուրիստական տարբեր կենտրոններ: Հրատարակչության տարածքում գործում է նաև «Էդիթ Պրինտ» ֆիրմային գրախանութը: